Gavekorti Paasissutissat
25. februar 2025

Isiginnaagassiaq iluatsilluartoq – Atuartut 400 sinneqartut Katuamut isiginnaariartut

`Inooriaasitoqaq´ qanga periusitoqqat, siulitta ulluinnarisimasaat kiisalu ukioq naallugu iliuuserisarsimasaat takorluuganngorlugu isiginnaagassiaq Katuap inersuaaraani isiginnaartitsissutigineqarnera iluatsilluarpoq. Isiginnaariarat 470 tikillugit amerlatigisut soqutigalugu ingerlanneqarnerani isiginnaariarpaat. Tamannalu aaqqissuussisunit tuppallernarpoq.

 

”Tuppallernaqaaq, meeqqat inersimasullu taamak amerlatigisut isiginnaariarsinnaammata. Ingammik isiginnaagassiamik taamak oqaasertaqartigisumik malinnaaqqissaarlutik isiginnaarsinnaammata,” aaqqissuusseqataasoq Naleraq Eugenius oqarpoq.

Kulturrygsæk suleqatigineratigut atuartut amerlasuut isiginnaariartut

Isiginnaagassiaq ilaqutariinnut atuarfeqarfinnullu piorsarsimassutsikkullu ilisimasaqarnerulernissaq eqqarsaatigalugu sanaajusup iluatsilluarsimanera Katuami pisortap nuannaarutigaa. Meeqqat 400-t sinnerlugit amerlatigisut isiginnaagassiaq Inooriaasitoqaq isiginnaariarpaat

 

”Isiginnaagassiortut Katuaq aamma Kulturrygsæk suleqatigiinnerasigut atuartorpassuit Katuamut isiginnaariarput. Kulturrygsæk atuarfinnut attaveqaataalluni isiginnaagassiortut timitaliillutik Katuallu inersuaaniititsisinnaanerat nuannaarutigaarput, meeqqammi amerlasuut isiginnaariarsinnaatitaasimapput,” taama oqarpoq Katuami pisortaq Ivaaq Kriegel.

Siunissamut pilersaarutit nutaat

Katuap inersuaaraani Inooriaasitoqaq-mik isiginnaartitsineq februarip 18-aniit 22-a ilanngullugu ingerlanneqarpoq, tamannalu aaqqissuisunit qujamasuutigineqarpoq:

 

” Qujavugut Katuamut inissaqartilluta suleqatigimmatigut, Nunatta isiginnaartitsivianut kiinappak atorsinnaagatsigu, Kukap Ilaqutaanut qujavugut tulukkap atisai suliareqqinneranut. Aammattaaq Kristiaap Nuummiinneranut aapparisaata ilaqutaanut. Minnerunngitsumillu inunnut tapersersuisunut qujarusuppugut,” oqarpoq Naleraq Eugenius, imalu naggasiilluni:

 

“Inuit isiginnaagassiornissatsinnik pilerisuttuaannarput, massakkut juullerpaluttumik pilersaarpugut pilersitserusulluta.”

Isiginnaagassiortut peqataasut 

  • Kristian Mølgaard: Isiginnaartitsisoq, isiginnaagassiamillu pilersitseqataasoq.
  • Kuka Fleischer: Isiginnaartitsisoq, isiginnaagassiamillu pilersitseqataasoq.
  • Naleraq Eugenius: Fundraiser, tekniker.
  • Hans Henrik Suersaq Poulsen (HH Suersaq): Atisaliortoq