Qulequtaq Hybrid Lisbethip eqqarsaataani sivisuumik sarsuarsimavoq, nalinginnalerilluni, ajattorneqarluni immersorneqarlunilu, saniatigullu “Sunaavunga”-mik apeqqummik pinngortitsilluni. Eqqumiitsuliortup kalaallinit qallunaanillu kingoqqisuusup akusatut marloqiusatullu misigisimasarpoq.
Kinaassuseq ilisimaneqarpoq akuerinaqarlunilu, taamaattorli nikerartarpoq pissutsit allanngoraangata.
Lisbeth Karline Nanortalimmi inunngorpoq, Fyn-imi Uummannamilu peroriartorluni. Meeqqat atuarfiani atuarluni assassornermi eqqumiitsuliornermut takorluuisinnaanera takkutiaarpoq, eqqumiitsuliornermi itisiliisinnaassuseqarluni. Efterskolemut ilinniarnertuunngorniarfimmullu eqqumiitsuliorsinnaanini attatiinnarpaa, Nuummi eqqumiitsuliornermut atuarfimmut 2003-imi atualernissani tikillugu. Tamatuma kingorna 2005-2009-imi Århus Kunstakademimut ingerlaqqippoq.
2011-imi Nuummut uteqqikkami peqatigiiffimmut KIMIK-mut ilannguppoq siulersuisunullu ilaasortanngorluni. Suliarisartakkaminik ataatsimoorluni saqqummersitsisarnerni amerlasuuni, frimærkinik, scenografiinik, atisanik isiginnaagassianilu arlalinni suleqataasarsimavoq.
“Hybrid” kisimiilluni saqqummersitsinermini sisamassaraat
Eqqumiitsuliornermik suliarisartakkamini eqqumiitsuliortup atortut isumassarsiallu assigiinngitsut akoortarpai, akutammi ilaatigut kinaassutsini marluusuni arlaliusuniluunni pitsaasumik ilaqartarmata. Tunngaviusumik nunasiaataanermi akutaaneq saqqummiussassatut siunertaasimagaluarpoq, suliarli eqqumiitsuliortumut saappoq eqqumiitsuliortutullu maannakkut aallariarnermut tunngassaaq
