Inuiattut ullorsiornermut atatillugu Katuami aaqqissuussamut imigassartaqanngitsumut suleqatigiinneq.
Inuiattut ullorsiornissamut atatillugu Katuaq Kommuneqarfik Sermersoorlu innuttaasunut kikkunnut tamanut ammasumik toqqisisimanartumik, tamanut ataatsimoorfiusumik nuannaarfiusumillu unnussiortitserusupput.
Aaqqissuussaq Katuami ingerlanneqassaaq imigassanillu aalakoornartortaqartinneqassanngilaq, ataatsimoorneq, nipilersorneq, nuannaarneq kalaallillu piorsarsimassusiat qitiutinneqassalluni. Aaqqissuussap siunertaraa ilaqutariit ataatsimoortinnissaat, inuusuttut inersimasullu nuannaaqatigiittut, takutinniarlugu Inuiattut Ullorsiorneq imigassartaqanngikkaluarluni ullorsiorfigineqarsinnaasoq ataqqinnilluni nuannaarfiullunilu.
Unnummi tusarnaartitsisussat ukuussapput:
* Ilannguaq & Leillah
* Tupaarnaq & Glenn Møller
* Scene kikkunnut tamanut ammasoq (akustisk), nipilersortartut pikkorissut tusarnaartitsinissaminnut periarfissaqartinneqarlutik ullorsiornermullu ilaaqataallutik.
Katuap Kommuneqarfik Sermersuullu suleqatigiinnerat piorsarsimassutsikkut nukittorsaaqataanissamut innuttaasunullu misigisassanut peqqinnartunut nuannersunullu pilersitserusunnerannik tunngaveqarpoq – ingammik Inuiattut ullorsiornertut pingaartigisumik ullorsiortoqartillugu.
Nipilersorneq, ataatsimoorneq aliikkuttallu toqqissisimanartut qitiutinneqassapput, kikkunnut tamanut ammasut.
Nuummi innuttaasut inuiattut ullorsioqatiginissassinnut qilanaarpugut.
