Pikialaarfik
Meeqqanut Inuusuttunullu Pikialaarfik
Peqataagit, pilersitsigit misigisaqarlutillu
Kommuneqarfik Sermersooq aamma Katuaq suleqatigiillutik nuannaarutigalugu ammassavaat Pikialaarfik, tassa Nuummi meeqqanut inuusuttuaqqanullu eqqumiitsuliornermik kulturilerinermillu sapaatip akunnera.
Pikialaarfik tassaavoq pilersitsiffiusumik, kiffaanngissuseqarlunilu namminiunissamut inissaqartitsivik. Sapaatip akunnerani tassani meeqqat inuusuttuaqqallu eqqumiitsuliorneq, nipilersorneq, eqqumiitsuliaqarnermi assigiinngitsut sammisassat nuannersut aqqutigalugit namminneq misileraanissaminnut periarfissinneqarput.
Sammisassat nuannersut assigiinngitsut:
Sapaatip akunnerani 43-mi assigiinngitsorpassuarnik sammisassaqartitsisoqassaaq:
- Katuami Ammaanersiorneq.
- Pikkorissaanerit & workshops: Soorlu bogmærkeworkshop, kiinnanik amiineq il.il.
- Aliikkusersuinerit & Saqqummersitsinerit: Atisanik atornikunik takutitsineq, tusarnaartitsinerit saqqummersitsinerillu assigiinngitsut.
Suleqatigisavullu meeqqanut inuusuttuaqqanullu nuannersunik neqerooruteqarnissatsinnut qulakkeerinnipput:
Allunnguaq, Allattarl', Nunatta Atuagaateqarfia, Musikskolen, NAPA, sunngiffimmi susassaqartitsiviit aamma Kittat.
Sapaatip akunnerani sanaat saqqummersinneqassapput, taamaalilluni meeqqat pilersitaat kusanartut Katuami takuneqarsinnaassallutik.
Tunngaviusoq:
Kommuneqarfik Sermersooq aamma Katuaq Nuummi meeqqat inuusuttuaqqallu eqqumiitsuliornermik kulturilerinermillu ukiumut ataasiarlutik sapaatip akunneranut misigisaqartinneqartarnissaat ukiuni tulliuttuni pingasuni isumaqatigiissutigaat.
Sapaatip akunneranik aaqqissuussisarnermi meeqqani inuusuttuaqqanilu eqqumiitsuliorneq kulturillu naleqartinneqarnerulernissaat anguniagarineqartoq, Katuaq Kulturip Illorsuata pisortaa tusagassiuutinut nalunaarummi allappoq.
