Paarnaq Rosing Jakobsen taalliaminik saqqummersitseqqammersoq, taalliai pillugit Sørine Steenholdtilu oqaloqatigiittut tusarnaariarit.
Paarnaq Rosing Jakobsen 1989-imi inuuvoq Nuummilu peroriartorluni. Psykologitut ilinniagaqarpoq, siullermeerlunilu taalliaminik saqqummersitsilluni.
Nunatsinni ukiuni kingullerni amerlasuuni atuakkiornerup silarsuaani taallianik saqqummersitsisoqarsimanngilaq, taamaattumik taallialerituut maqaasisaqarsimanerat matussuserluarpoq Paarnap taalliani 100-nit ikinnerunngitsut imartoqisullu saqqummersimmagit qulequtalimmik Taartumi Sulugissarpoq.
Paarnap taalliamini kinaassuseq kiinarpaligaq sammivaa, kingumullu kinaassuseq kiinarpaqanngitsoq qunnersuarmit inussiaataajunnaarnissaa pillugu oqariartuuteqarluni.
Paarnap taalliai isumamikkut imartoqisut nukerujussuarmik pajuttutut ipput. Taalliamini oqaatsinik atueriaasia assigineqanngilaq, kalaallisullu taalliaatigut qiviassagaanni nalitsinni siullersaalluni kalaallisut oqaasertunini assilianngortitsisarnermigut assersuusiortarnermigullu ersersippaa, kalaallisullu oqaasertusartuarnissatsinnik neriulersitsilluni.
Aaqqissuussamut tunngatillugu Inersuaaqqap iigarsui Cafétuap tungaanut ammassapput taamaalillutit ikinngutitillu unnussiuaariartoritsi Cafétuamut imeruersaatigerusutussannik najoqqagalerlusi.
