Chilly Friday 00-kkunni Kalaallit Nunaanni tusaamasanngorput nunalu tamakkerlugu tusarnaartitsiffitsik ulikkaartarlugit. CD-liaat siulleq Inuiaat 2000 saqqummermat ingerlaannaq nuannarinnittorpassuaqalerput erinarlu Iggo immikkut nuannarineqarlualerpoq ulloq manna tikillugu nuannarineqarluarluni. Katuap Chilly Friday 2015-mili tusarnaartitsisut tikilluaqqunissaat qilanaaraa.
Rockimik tusarnaartitsineq qaqutigoortoq
Chilly Friday Katuami Hans Lyngep Inersuani tallimanngornermi januarip 29-ni tusarnaartitsilerpata rockerpaluttumik tusarnaartitsisoqarnera malugineqarsinnaajumaarpoq. Katuami tusarnaariartartut sungiusimavaat paarlersuarmi angerpasittumik kusanartumillu inuit 1200-t akornani tusarnaartitsisoqartartoq.
Tamannali ukioq kingulleq martsimi periarfissaajunnaalersimavoq inuit katersuusinnaaneri killilersugaalermata. Isumaqanngilarli tusarnaariat rockimik tusarnaartitsisunik tusarnaariarsinnaanngitsut. Chilly Friday marloriaq tulleriiginnartunik tusarnaartitsissapput nal. 20:00 aamma 22:00 immikkut inunnik 100-nik inissaqarlutik.
”Tusarnaartitsineq Hans Lyngep Inersuani pisussaammat tusarnaariat issiasussaassapput.
Misigisarli minnerunavianngilaq, tassami torrattumik kusanartumillu tusarnaartitsisoqarnissaa ilimasaarutigisinnaavarput paarlersuarmisut qulliit kusarnartut scenemullu ikkussuinernut pilersaarutit annertupput”, aaqqissuussinernut pisortaq Camilla Høg oqarpoq.
