Prussic - Misiliineq kingulleq isissutissat tuniniarnerini rekordiliivoq

Prussic – Misiliineq kingulleq isissutissat tuniniarnerini rekordiliivoq

Prussic ukiuni kingullerni aqqaneq marlunni tusarnaartitsinikuunngeriarlutik 4. april aamma 5. april naggataarlutik Katuap inersuani isissutissat tamakkerlugit tusarnaartitsitsipput.

Tusarnaartitsinissaq ataasiinnaasussaagaluartoq nalunaarutigineqarneraniit 8 tiimip ingerlanerinnaani isissutissat tamakkermata aalajangerneqarpoq ullormik ataatsimik ilaqqinneqassasoq, tamannalu aamma ulikkaarlugu tusarnaartitsivigineqarpoq.

Tamannalu Prussic-imit tuppallernartinneqarpoq:

”Ulluit marluk sold out-ernerput tupinnaqaaq nuannerlunilu. Taamak tapersersorneqartiginerput tuppallernaqaaq,” taama oqarpoq Maasi Pedersen nangillunilu;

 “Ukiorpassuarni malinnaasut qujaffigerusullugit tusarnaartitsinissarput aalajangiunnikuuarput, nuannernerpaavoq Prussic tamattaasinnaagatta,” Maasi Pedersen naggasiivoq.

Ukiuni pingasuni tusarnaartitsinissaat uteriissutigineqartoq

Tusarnaartitsinerup ingerlanerani Maasi qujassuteqarmat nillerrassutigineqarpoq, tusarnaartitsinissaammi ukiuni pingasuni uteriissutigineqarsimasoq pillugu Arny Mogensen qujaffigimmagu ukiuni taakkunani tusarnaartitsinissaat kajumissaarutigiuarsimammagu.

Aallaqqaammut Prussic saqqummeqqaarneraniit ukiut 20-inngortorsiorlugit tusarnaartitsinissaat kajumissaarutigisarsimagaluarpaa, iluatsinngitsoormat Maasip saqqummersitaa aamma ukiuni 20-nngortorsiornerani nipilersortussat inissereerlugit aamma tusarnaartitsinissaa angorusussimagaluarpaa iluatsinngitsumilli.

Sinnattoq piviusunngortoq

Arnyp Kunuk Taatsilu Qaqortumi meeraaqatiginikuusani saqqummersitseqqaarmatali sinnattorisarsimavaa scene-meeqatiginissai tamannalu piviusunngorpoq; “Saqqummermatali sinnattorisarnikuuara – sinnattoq piviusunngorpoq. Ingasassuaarpoq taanna, QUJANAQ oqaaseq naammanngilaq,” taama oqarpoq Arny Mogensen nangillunilu;

“Ukiut 20-it sinnerlugit tusarnaartagarinikuullugit urealistiskiorsuaarpoq taamatut appisimaaqatigalugit. Ersinngitsumik qamuuna tanngassimaarsuaarpunga tulluusimaarsuaarlungalu appeqatigigakkit, ” Arny Mogensen naggasiivoq

Prussic qujaffigaarput Katuaq naggataarfigalugu tusarnaartitsiffigisinnaammassuk.