Katuaq Riddu Riđđu Festivalimi peqataavoq: Suleqatigiinneq isumassarsiornerlu

Riddu Riđđu Festivali tassaavoq nunat tamalaat akornanni inoqqaat kulturikkut nalliuttorsiornerat, ukiumut ataasiarluni Kåfjordimi, Norgemi Sápmip ilaani ingerlanneqartartoq.

Festivalimi ilaqutariinnut tamanut sammisassat assigiinngitsut neqeroorutigineqartarput, soorlu nipilersorneq, pikkorissartitsinerit, isiginnaartitsineq, atuakkanik saqqummiussinerit, meeqqanut festivali, inuusuttunut tammaarsimaarneq (camp), isumasioqatigiinnerit, eqqumiitsulianik saqqummersitsinerit kiisalu filmernerit.

Festivali annerpaamik silami ingerlanneqartarpoq, ilaali illuni ataatsimoorfinni aammalu toqqini pisarlutik.

Kalaallit Nunaata, Sápmip nunallu allat inoqqaavisa akornanni attaveqarneq pingaaruteqarluinnarpoq.

Tassani oqaatsivut, kulturivut, kinaassutsivut pisinnaatitaaffivullu illersorniarlugit misilittakkavut avitseqatigiissutigisarpagut. Suleqatigiinnikkut immitsinnit ilikkagaqarfiginerusinnaavugut, nunarsuarmilu nukittunerusumik ataatsimoorluta nunat inoqqaavisa nipaat tusarneqarlunilu ataqqineqarnissaa qulakkeersinnaallugu, ullumikkut kinguaariinnullu tulliuttunut.

Tamanna pissutigalugu Katuap festivalimi peqataanissaa pingaaruteqarsimavoq, tassami isumassarsianik nutaanik, attaveqarfinnik kiisalu ilisimasanik avitseqatigiinnermik pissarsiffiummat.

Eventkoordinatori Tukummeq Korneliussen aamma Nipilersornermut ataqatigiissaarisoq Birte Olsen festivalip aallartitanut aaqqissuussaanut peqataapput.

Taakkua festivalimi tusarnaartitsinerit, eqimattakkuutaarluni suleqatigiinnerit, isumasioqatigiinnerit, saqqummersitsinerit, meeqqanut sammisassat, oqaloqatigiinnerit allarpassuillu misigisaqarfigalugit peqataaffigaat.

Katuaq peqataanermigut nunat tamalaat akornanni attaveqarfinnik nutaanik, isumassarsianik kiisalu ilisimasanik naleqartunik avitseqatigiinnermik pissarsivoq, tamannalu kulturikkut suleqatigiinnermik ineriartortitsinermillu nukittorsaaqataavoq.

Riddu Riđđu festivali suleqatigiilluarnermut qutsavigingaarparput.

Aningaasaliisumut immikkut qujassuteqarpugut:
Eqqumiitsuliornermut Aningaasaateqarfik.