Gavekorti Paasissutissat
13. marts 2026

Katuami Arnaq ingerlanneqartoq tassaavoq suliniut nipilersornermik ataatsimoorfiusoq, arnanut nipilersortartunut inuusuttunullu periarfissiisoq. Suliniutip siunertaraa nipilersornerup silarsuani arnat sutigut tamatigut inissaqartilernissaat arnallu pisinnaatitaaffii pillugit qaammarsaanissaq.

 

Aaqqissuussaq nipilersornerup iluani ataqatigiissaarisup Birte Olsen aqutsisuuffigaa, Nina Kreutzmann Jørgensenimillu pilersinneqartumik 8. marts Nunarsuaq tamakkerlugu Arnat Ulluat malunnartinniarlugu ullormi tassani ingerlanneqarpoq. Taannali sioqqutingaatsiarlugu workshop, suleqatigiinnerillu aqqutigalugit peqataasut tusarnaartitsinermik suliaqarput, misilittakkanik avitseqatiigiillutik, isumassarsianik pilersititsillutik tusarnaartitsinerlu aqqutigalugu suliatik saqqummiullugit Katuami Inersuaq Hans Lyngemi tusarnaartitsinerit marluk isissutissat tamarmik nungunneqarlutik ingerlanneqartuni. Peqataasunullu suliniutip ingerlanerani arnat pisinnaatitaaffii, naligiissitaanerlu pillugit oqaloqatigiinnerit pikkorissarnerillu ilaapput.

 

Suliniut Arnaq arnat nipilersortartut inuusuttullu immikkut piginnanillit naapeqatigiinnissaannut periarfissiivoq, nipilersortartunut imminnut tapersersoqatigiinnissamut, isumassarsioqatigiinnissamut, nipilersorneq aqqutigalugu imminut oqaluttuarinissamik arnallu pisinnaatitaaffii pillugit oqaloqatigiinnissamut ammaassivoq. Suliniutip Kalallit Nunaanni nipilersornerup silarsuaani arnat saqquminerulersippai takutillugulu nutaaliorsinnaaneq, ataqatigiissinnaaneq aammalu naligiissitaanerup pingaaruteqassusia.

Ukioq 2026-mi oqaluttuarisaanermi aatsaat taama annerutigisumik suliaasumik arnaannarnit ingerlanneqartumik tusarnaartitsisoqarpoq. Imaalluni, tusarnaartitsisut, nipilersortut, erinarsortut aammalu teknikkikkut suliaqartut tamarmik arnaallutik.

 

Suliniut ukunanit aningaasalerneqarpoq: Eqqumiitsuliornermut Aningaasaateqarfik, NAPA, Tips- og Lottomidlerne Pulje C, Katuaq, Arctic Sounds Academy, Inuit Quality Clothes of Greenland, Nuuk Water Taxi.

Arnaq-mi peqataasut

Ivi Luna Olsen 20-inik ukioqarpoq, adventure guidetut ilinniarsimasuuvoq pinngortitamiinnissanilu nuannarisuullugu. Saniatigut qitittartuuvoq nipilersornermillu nuannarisaqartuulluni

 

Sara Andersen 21-inik ukioqarpoq eventteknikerinngorniartuuvoq qullillerineq siunnerfigalugu. Sunngiffimmini Athenamut bassertuusarpoq.

 

Maalia R. Skifte 17-inik ukioqarpoq nuummilu najugaqarluni. Nipilersorneq aallutaraa guitarertarluni, erinarsorluni, taalliorluni aammalu qilaatersortarluni.

 

Sacha Olsen 17-inik ukioqarpoq nuummi inunngorlunilu peroriartorpoq, erinarsorneq nuannarisuuaa bassertarlunilu.

 

Pani Enequist Maniitsumi inunngorpoq maannakkullu meeqqani marlut uinilu nuummi najugaqatigai. Nipilersortartoqatigiinni Sound of the damned-ni peqataavoq ulluinnarnilu KNR-imi aaqqissuisuulluni.

 

Arnarissoq Bech Vetterlain 19-nik ukioqarpoq, Italiami najugaqarluni erinarsornermi unamminermi ajugaareernermi kingorna aamma nunatsinni erinagissorsuartut ilisimaneqarlualereersoq. 

Aasianni GU ingerlappaa, Arnaq peqataaffigiartorlugu Nuummut tikissalluni. 

 

Hollie Kielsen erinniortuuvoq, nipilersuusiortoq takusassianillu eqqumiitsuliortoq (qalikkanik eqqumiitsuliortoq)

 

Aviaq Lange 19-inik ukioqarpoq uummannami inunngorluni. Meeraallunili nipilersorneq soqutigisariuaannarpaa.

 

Lyliss Morrinz Frankrigimi inunngortoq 2022-mili nammineerluni qullilerinermi teknikeritut ilinniarpoq. Sverigimi assigiinngitsuni suliaqartarpoq, erinarsorluni isiginnaagassiani aammalu isiginnaagassiani nangeqattaartuni qullilerisarluni.

Parnaq Hammond Iversen Ilulissani peroriartortoq Kalaallit Nunaanni siullersaalluni arnani rappertartuni nuuteeqqamik saqqumersitsisuuvoq. Rappertarnermini tunniutiinnarumasannginnermini hiphop silarusuaani arnaqatiminut aqqutissiuisuuvoq.

 

Malu Falck 33-nik ukioqarpoq, medie grafikeritut namminersortuuvoq. Nuummi inunngorpoq Aalborgimi Qasigiannguanilu peroriartorluni.

 

Naja Panuuna Vahl Olsen erinniortuullunili taalliortuuvoq eqqumiitsuliortutut atiminik Naja P-imik ilisimaneqarnerusoq. Najap saqqummersitserngaataa “Naasunnguusunga” ukiumi 2023-imi Koda Awardimi Ukiumi Nuuteeqqami kiisalu Ukiumi Saqqummersitami nersornaammik tunineqarpoq.

 

Ulla Kajussen qullilerisutut soqutigisaqartuuvoq ikkussueqataasutut kiisalu appisimaartoqarnerani qullilerisuulluni misilittarnikuullugu. Kingullermik Arctic Sounds ingerlanneqarnerani stagehands-itut peqataalluni.

 

Veronica Wilhjelm Geisler 18-inik ukioqarpoq nuumminngaanneersuulluni. Mikisuullunili sunngiffimmini nipilersorneq sammisorujussuullugu.

 

Ihan Haydar erinniortuullunilu tumerparpaartuuvoq. Nipilersortartoqatigiit ukiuni 13-ini ilaaffigisartakkani L.I.G.A marlunnik inuttaqartuusoq misilittagaqarfigaa. Maannakkulli nipilersortartuunermini nutaamik pissanganartumillu misiliilerpoq, ukioq manna nammineerluni nipilersortartutut aallartippoq.

 

Nina Kreutzmann Jørgensen Kalaallit Nunaanni erinarsortartutut erinniortutullu ilisimaneqarluarpoq. Erinarsoriaasia pop-erpalaartoq, soul aamma R&B-erpalaartuuvoq tamannalu ukiut ingerlanerini ilisimaneqaatigilluarlugu. Suliniut Arnaq aallartitaraa maannakkullu ukiut aappassaa ingerlalluni.

 

Jensia Højgaard Dam nipilersortartutut nipilersuusiortartutullu suliaqarnernermini nipilersortartut aaqqissuussallu assigiinngitsorpassuit kiisalu erinarsortartoqatigiit katerinneri suleqataaffigisareerpai.

 

Malin Hansén Norr Collective-imik Stockholmimiittumi aallarneeqataavoq, ukiuni qulini aaqqissuussani angisuuni angalaarlunilu tusarnaartitsiartornerni nipilersuusiortutut misilittagaqarpoq.

Nutaarsiassat kingulliit aamma atuakkit