Dansehallernemi attaveqaqatigiit naapinnerat

Katuai nipilersornerup iluani ataqatigiissaarisoq Birte Olsen januarip 20-ani Dansehallernep aaqqissugaanik attaveqaqatigiit naapinnerannut peqataajartorluni aallarpoq.
Nunani avannarlerni qitinneq meeqqanut inuusuttunullu qanillisarnissaanut periarfissaasinnaasut eqqartorniarlugit attaveqaqatigiit naapeqatigiipput.

Ukiaq Katuap qitittartoqatigiit Aviaja Dance Kalaallit Nunaanni angalaartillugit aallartippai, illoqarfinnilu makkunani tikinneqartuni; Kulusuk, Tasiilaq, Nuuk, Maniitsoq aamma Kapisillit akeqanngitsumik isiginnaartitsipput saniatigullu meeqqat atuarfianni atuartunut pikkorissartitsillutik. Angalaarnerup ingerlanerata iluatsilluarsimanera attaveqaqatigiit naapinneranni qitik meeqqanut inuusuttunullu qanoq soqutiginarsarnissaanut ilisimasanik tunngaviliivoq – aammattaaq Kalaallit Nunaanni.

Attaveqaqatigiit naapinnerat Dansehallerne (Danmarkiit). Nordens Hus (Savalimmiuniit), Kulturkraft (Ålandimiit) kiisalu Suialaa Arts Festivalimit (Kalaallit Nunaanniit) peqataaffigineqarpoq.

Siunissami ataavartumik suleqatigiilluarnissatsinnut qilanaarpugut.

Minnerunngitsumik NAPA-mut (Nunani Avannarlerni Piorsarsimassutsikkut Attaveqaat) qujavugut angalanermi tapiisimanissinnut, naapeqatigiinnermi peqataanissaq piviusunngortissimasinnaammassuk.