Katuaq Eqqumiitsulionermik Ilinniarfillu ukiumoortumik ilinniartut eqqumiitsuliaminnik saqqummersitsisarnerannut suleqatigiinnissamut isumaqatigiissummik ukiuni pingasuni atuuttussamik atsioqatigiipput.
Isumaqatigiissutip siunertaraa eqqumiitsulionermik ilinniarfimmi ilinniartut inaarutaasumik saqqummersitsisarnissaat sinaakkusersornissaanut suleqatigiinnissaq. Saqqummersitsineq ilinniartut naammassinerannik nalunaaqutsiisussaavoq suliaminnillu innuttaasunut takutitsinissaannut periarfissiilluni.
Eqqumiitsuliornermik ilinniarfiup Katuallu suleqatigiinnertik eqqumiitsuliornermut piorsarsimassutsimullu paasinneqatigiinneq, inuiaqatigiinnilu pingaarutilittut nalilittullu pilersitsisutut tunngaveqartippaat. Ilinniartut saqqummersitsinerminni ilikkagaqarluarnartumik ilinniarnerminnillu inaarutaasumik isumaqarluartumik naammassinnissapput. Taamatuttaaq Katuami isertartut eqqumiitsuliortut isummeriaasiannik suleriaatsinillu nutaajusunik paasisaqassallutik.
Isumaqatigiissut inuiaqatigiinni eqqumiitsuliortunut siuarsaaqataassaaq inuusuttunullu Kalallit Nunaanniittunut periarfissanik nutaanik pilersitsilluni.
Katuaq tulluusimaarpoq eqqumiitsuliortunngortussanut kinguaariinni tulliuttunut eqqumiitsuliornermi sunniuteqartussanut eqqumiitsuliaannik saqqummersitsinissamut periarfissaqartinneqarami.
Eqqumiitsulianik saqqummersitsineq ullumi junip arfernani ammaanersiorneqassaaq, junillu 22-iat ilanngullugu eqqumiitsuliat takuneqarsinnaajumaarlutik
